Spring naar inhoud

Onze Prins

Leef luuj va Bèngelder,

Ich prins Branko I sjtèl mich gear an uch veur.

Ruim 4 x 11 joar geleaje bin ich in de carnavalstiëd in Gelean geboare en opgegreujd in Puth mit mien auwesj en zuske Marjon.

De middelbare sjoal hub ich gevolg in Gelean, woa ich un Sjènnes maedje Ilse liërde kènne.

Doanoa bin ich rechte goan sjtudeere in Nijmege en aansjleetend begos es kandidaat-notaris in Gelean. 

Inmiddels woon ich al 21 joar mit Ilse in de Geersjtroat in Bèngelder, zint veer getrouwd en hubbe veer twië leef zonen Kjell (15) en Mats (12). Aangezeen dat alle twië fanatieke zjwummers zeen, bemuj ich mich auch geregeld mit ut reile en zeile van ut zjumwater en de watersjport in de regio. 

De botterram verdeen ich es notaris in Beak bie Metis notarissen en Hogeschool Zuyd. Zo noe en dan bin in in ut boeteland om leazingen te geave of te euverlègge omdat ich mich gespecialiseerd hub in internationaal familierech. 

In miene vrieje tied goan ich jekere zoaterdig sjporte bie Reuvers in Munstergelean. Mien anger sjport is skiën, wat ich jeker joar mit mien gezin en familie in Oostenreik doon. DIt joar goan ich waal get laater om de ganze vasteloavend es prins euver Bèngelder te kinne regeere.

Doaneave reur ich mit reigelmoat mit unne groep mansluuj saame in de panne bie de Opsjuppers. Koakclup moagse ut eigenlik neet numme, mer lekker eate doont veer zeker en ummer onger ut genot van veul gezelligheid.

De vastelaovend zit bie mich in ut blood.Op de 11 van de 11 begint veur mich de carnaval en heurse bie mich in de auto bienoa allein noch mer vastelaoves leedjes. Inmiddels bin ich auch al gans get joare mit veul plezeer lid van C.V. De Keescheknup. Ich ving ut geweldig dat ze mich dit joar es prins hubbe oetgekoaze en zal zeker mit trots in de Bèngelder vasteloavend veurop goan in de polonaise. Ich haup dat ich uch bie veul vasteloaves aktiviteite teage kom en dat ich saame mit de raod van 11, mien familie, vrung en mit uch unne onvergeatelike vastelaovend moch viere.

Alaaf

Prins Branko I